Այսօր 1999 թվականի հոկտեմբերի 27-ի ողբերգության տարելիցն է

1999-ի հոկտեմբերի 27-ին խորհրդարանի շենքում կառավարության հետ հարցուպատասխանի ժամանակ տեղի ունեցած ահաբեկչության հետեւանքով սպանվեցին 8 պետական գործիչներ, այդ թվում` Ազգային ժողովի նախագահ Կարեն Դեմիրճյանը, վարչապետ Վազգեն Սարգսյանը:

Իշխող Հանրապետական կուսակցությունը եւ ընդդիմադիր Հայ ազգային կոնգրեսը այսօր Եռաբլուրում ու Կոմիտասի անվան պանթեոնում հարգանքի տուրք են մատուցում զոհերի հիշատակին:

Հիշատակման արարողություն է տեղի ունեցել նաեւ Ազգային ժողովի բակում՝ զոհվածների հիշատակը հավերժացնող հուշակոթողի մոտ:

Արարողությանը ներկա էին Վազգեն Սարգսյանի մայրը` Գրետա Սարգսյանը, եղբայրը` Արմեն Սարգսյանը, Կարեն Դեմիրճյանի, մյուս զոհերի այրիները:

«Ոճրագործություն, որ առաջին հերթին ոտձգություն էր ոչ միայն պետական քաղաքական ականավոր գործիչների կյանքի նկատմամբ, այլեւ` հարված պետականության ողնաշարին: Ողբերգական իրադարձությունների հետեւանքով կորցրեցինք պետության ու ժողովրդի նվիրյալ զավակների, ովքեր իրենց ապրած կյանքով ու գործունեությամբ ազնվորեն ծառայեցին երկրին ու հասարակությանը», - ասաց Հովիկ Աբրահամյանը` հավելելով. - «Կարեն Դեմիրճյանը, Վազգեն Սարգսյանը, Յուրի Բախշյանը, Ռուբեն Միրոյանը, Միքայել Քոթանյանը, Արմենակ Արմենակյանը, Հենրիկ Աբրահամյանը, Լեոնարդ Պետրոսյանը մեր պետականության կայացման պատմության անբաժանելի մասն են»:

Նորանոր կասկածներ

Զոհվածների հարազատները 11 տարի անց էլ շարունակում են պնդել, որ հանցագործությունը բացահայտված չէ:

«Առայսօր Վազգենի բացակայությունը իմ, իմ ընտանիքի համար ակնհայտ ու բացարձակ է: Նույնը նաեւ Վազգենի բազմաթիվ ընկերների համար, բայց ոմանց համար էլ Վազգենի կորուստը նոր դռներ բացեց` ներքին ցանկություններին, նյութապաշտությանը հագուրդ տալու հնարավորություններ», - «Ազատություն» ռադիոկայանի հետ զրույցում ասաց Վազգեն Սարգսյանի եղբայրը՝ ընդդիմադիր «Հանրապետություն» կուսակցության ղեկավար Արամ Սարգսյանը` հավելելով. - «Միայն այն փաստը, որ այդ օրը զոհվեց ոչ միայն Վազգենը, այլեւ Կարեն Դեմիրճյանը, Ազգային ժողովի մի շարք պատգամավորներ ու նախարարներ, խոսում է այն մասին, որ խնդիրը ուղղված չէր ինչ-որ մարդու դեմ. խնդիրն ուղղված էր ուժ ներկայացնող համակարգի դեմ, եւ դրա համար էր նաեւ Կարեն Դեմիրճյանի ուղղակի նպատակային սպանությունը»:

Հոկտեմբերի 27-ին սպանված Յուրի Բախշյանի տիկնոջ` ընդդիմադիր «Ժառանգություն» խմբակցության պատգամավոր Անահիտ Բախշյանի կարծիքով, այն մարդիկ, ովքեր ասում են, թե սպանությունները բացահայտվել են` «ավելի վնասում, հեղինակազրկում են պետությանը»:

«Արձանագրենք, որ 11 տարի առաջ երկիրը գլխատվեց, 11 տարի է պետության մեջ անպատժելիության մթնոլորտը շարունակում է ահագնանալ եւ հսկայական վնասներ է բերում երկրին», - հայտարարեց Անահիտ Բախշյանը:

Հոկտեմբերի 27-ի ահաբեկչությունը

1999 թվականի հոկտեմբերի 27-ին Նաիրի Հունանյանի զինված ոճրախումբը, ներխուժելով խորհրդարանի նիստերի դահլիճ, իրականացրեց աննախադեպ ահաբեկչություն ՝ գնդակահարելով 8 պետական գործիչների:
Հոկտեմբերի 27-ի ահաբեկչությունը. ֆոտոարխիվ

Ահաբեկչությանը զոհ դարձան Ազգային ժողովի նախագահ Կարեն Դեմիրճյանը եւ վարչապետ Վազգեն Սարգսյանը, խորհրդարանի փոխնախագահներ Յուրի Բախշյանը եւ Ռուբեն Միրոյանը, պատգամավորներ Միքայել Քոթանյանը, Հենրիկ Աբրահամյանը եւ Արմենակ Արմենակյանը, նախարար Լեոնարդ Պետրոսյանը:

2003 թվականի դեկտեմբերի 2-ի դատավճռով Երեւանի Կենտրոն եւ Նորք-Մարաշ համայնքների առաջին ատյանի դատարանը ցմահ ազատազրկման դատապարտեց Նաիրի Հունանյանին եւ նրա հանցախմբի 5 անդամներին, հանցախմբի եւս մեկ անդամ դատապարտվեց 14 տարվա ազատազրկման: Ցմահ ազատազրկման դատապարտված Վռամ Գալստյանը հետագայում ինքնասպանություն գործեց:

«Ազատություն» ռադիոկայանի թղթակիցը զրուցել է զոհվածների շիրիմներին այցելած քաղաքական գործիչների ու զոհերի հարազատների հետ:

Source Publication: www.azatutyun.am
Source: http://www.azatutyun.am/content/article/2203127.html

Name: nana
Comment: amen inch jishte

Name:

Invalid value

Comments:

Invalid value

Submit