Իրական հանդուրժողականության պահանջ

«Ինչպես 1999 թ. հոկտեմբերի 27-ը, նույնպես և 2008 թ. մարտի 1-ը, եկավ կոտրելու մեր ժողովրդի կամքն ու ոգին: Մարտի 1-ով, մանավանդ, մեծ հիասթափություն ապրեց սփյուռքահայ երիտասարդ սերունդը, իր նորանկախ և երանելի երկրում ականատես դառնալով մասսայական ցույցի դեմ աներևակայելի դաժանության և սպանդի»,-ասված է «Եվրոպայի Հայերի Համագումար» կազմակերպության հայտարարության մեջ:

Մարտյան ողբերգության երկրորդ տարելիցի առիթով արված հայտարարության մեջ ԵՀՀ-ն մատնանշում է այն քայլերը, որոնք, ըստ նրա, Հայաստանում անհապաղ պետք է իրականացվեն:

«Հրամայական պահանջ է երկրում հաստատել իրական և ոչ թե ձևական համերաշխության և փոխհանդուրժողականության մթնոլորտ: Չքաղաքականացնել ոչ մի դատավարություն և ազատ արձակել քաղաքական դրդապատճառներով ձերբակալված ու դատի ենթարկված բոլոր ձերբակալվածներին: Ձեռնարկել միջոցներ, որոնք իսպառ կբացառեն հետագայում նման իրադարձությունների կրկնությունը

• Երկրում հաստատել օրենքի գերակայություն

• Մշակել և ներդնել սոցիալական արդարության հաստատման ռազմավարական ծրագիր

• Վերացնել տնտեսական ոլորտի արտոնությունները, ապահովել ազատ, արդար և ազնիվ մրցակցություն

• Ապահովել ՀՀ-ի Սահմանադրության պահանջները և տարանջատել օրենսդիր, գործադիր և դատաիրավական համակարգերի գործունեությունը

• Անցկացնել թափանցիկ և արդար ընտրություններ` ապահովելով արժանապատիվ և բանիմաց քաղաքացիների մուտքն Ազգային Ժողով և տեղական ինքնակառավարման մարմիններ

• Կիրառել նոր, արդիական մոտեցումներ երկրի տնտեսական և ներքին արդյունաբերության զարգացման համար, ապահովել նաև արտաքին ներդրումային ծրագրերի ապահովածություն` այլևայլ բյուրոկրատական, կրիմինալ և օլիգարխիկ-մոնոպոլ խոչընդոտներից

• Ապահովել պետականության ամրապնդման և հզորացման համար ներդրում ունեցող քաղաքացիների բարեկեցիկ և իմաստալից կյանք»,-ասված է հայտարարության մեջ:

ԵՀՀ-ն կոչ անում համայն հայությանը, անկախ իրենց զբաղեցրած դիրքից և ֆինանսա-տնտեսական վիճակից, «ձեռնամուխ լինել վերոնշյալ գործընթացների իրականացման օժանդակմանը` հանուն անխոցելի ազգային միասնության, ժողովրդի ազատ ու երջանիկ կյանքի ապահովման և հայոց պետականության հզորացման և հարատևման»:

Source Publication:
Source: http://www.a1plus.am/en/politics/2010/03/1/aae

Name:

Invalid value

Comments:

Invalid value

Submit